O‘zbekistonda daraxt ekish va ekologik tashabbuslarda faol ishtirok etgan fuqarolar hamda tadbirkorlar uchun yangi rag‘batlantirish tizimi joriy etilmoqda. Bu haqda Shavkat Mirziyoyevning “Yashil makon” umummilliy loyihasi samaradorligini oshirishga qaratilgan farmonida belgilandi.
“Ekofaol fuqaro” va “ekohamkor” maqomlari
Farmonga ko‘ra:
- kamida 100 tup daraxt ko‘chatini ekkan yoki “Yashil xayriya jamg‘armasi” platformasiga kamida 10 mln so‘m xayriya qilgan shaxslarga “ekofaol fuqaro” maqomi beriladi;
- kamida 1000 tup daraxt ekilishini tashkil qilgan yoki platformaga 100 mln so‘m hadya qilgan tadbirkorlik subyektlariga “ekohamkor” maqomi beriladi.
Shuningdek, tadbirkorlar ushbu maqomdan o‘z faoliyatini reklama qilishda foydalanish huquqiga ega bo‘ladi.
“Metsenat” unvoni va davlat mukofoti
Yana bir muhim yangilik — katta miqyosdagi ekologik hissa uchun alohida e’tirof:
- kamida 50 ming tup daraxt ekilishini ta’minlagan yoki 5 mlrd so‘m xayriya qilgan shaxslarga “metsenat” unvoni beriladi;
- Qoraqalpog‘iston Respublikasi, viloyatlar va Toshkent shahrida kamida 5 ta “yashil bog‘” yoki “yashil jamoat parki”ni o‘z mablag‘i hisobidan barpo qilganlar “Kelajak bunyodkori” davlat mukofoti bilan taqdirlanadi.
Pul mukofoti va imtiyozlar
“Kelajak bunyodkori” medali sohiblari bazaviy hisoblash miqdorining 10 baravari miqdorida bir martalik pul mukofoti oladi. Bundan tashqari, ularga qonunchilikda belgilangan turli imtiyozlar ham taqdim etiladi.
Mazkur tashabbuslar “Yashil makon” loyihasi doirasida aholini ekologik harakatlarga keng jalb qilish, daraxt ekish madaniyatini oshirish va yashil hududlarni kengaytirishga xizmat qilishi kutilmoqda.
