Andijon shahridagi 2-son tug‘uruq majmuasida bir yo‘la 5 nafar chaqaloq dunyoga keldi. Bu haqda Sog‘liqni saqlash vazirligi axborot xizmati xabar berdi.
Ma’lum qilinishicha, Andijon shahrining “Qayrag‘ochtosh” mahallasida yashovchi Nargiza Bekjonova 6-iyul kuni ko‘p homilalik tashxisi bilan tug‘uruq majmuasiga yotqizilgan.
Shifokorlar tomonidan unga muddatidan oldin tug‘uruq tashxisi qo‘yilib, kesarcha kesish amaliyoti o‘tkazilgan. Operatsiya akusher-ginekolog, neonatolog va reanimatolog mutaxassislar ishtirokida muvaffaqiyatli bajarilgan.
Natijada 5 nafar chaqaloq — 3 nafar qiz va 2 nafar o‘g‘il dunyoga kelgan.
Chaqaloqlarning vazni quyidagicha:
- birinchi qiz — 1450 gramm;
- ikkinchi o‘g‘il — 1605 gramm;
- uchinchi qiz — 1495 gramm;
- to‘rtinchi o‘g‘il — 1585 gramm;
- beshinchi qiz — 1205 gramm.
Ixtisoslashtirilgan tibbiy yordam ko‘rsatish maqsadida ona va chaqaloqlar Respublika ixtisoslashtirilgan ona va bola salomatligi ilmiy-amaliy tibbiyot markazining Andijon viloyati filialiga o‘tkazilgan.
Sog‘liqni saqlash vazirligi ma’lumotiga ko‘ra, ayni paytda ona va besh nafar chaqaloq shifokorlar nazoratida bo‘lib, ularning salomatligi qoniqarli.
