Loyiha doirasida G‘uzor-Buxoro-Nukus-Beyneu (A380) avtomobil yo‘lining taxminan 87 kilometri rekonstruksiya qilinadi. Shuningdek, 75 kilometrlik yangi aylanma yo‘l (To‘rtko‘l – Ellikqal’a – Beruniy) quriladi.
Osiyo taraqqiyot banki (OTB) O‘zbekistonga Markaziy Osiyo mintaqaviy iqtisodiy hamkorlik (CAREC-2) yo‘lagining asosiy qismini modernizatsiya qilish uchun 233,1 million AQSh dollari miqdorida qarz ajratishni ma’qulladi. Loyiha mintaqaviy aloqani yaxshilash, sayohat vaqtini qisqartirish, yo‘l harakati xavfsizligini oshirish va mamlakatning g‘arbiy hududlarida transport infratuzilmasining iqlim o‘zgarishiga chidamliligini oshirishga qaratilgan.
CAREC-2 yo‘lagining mustahkamligini oshirish va modernizatsiya qilish loyihasi Qoraqalpog‘iston Respublikasidagi G‘uzor-Buxoro-Nukus-Beyneu (A380) avtomobil yo‘lining taxminan 87 kilometrini rekonstruksiya qiladi.
Shuningdek, Loyiha doirasida 75 kilometrlik yangi aylanma yo‘l (To‘rtko‘l – Ellikqal’a – Beruniy) qurilib, mavjud A380 yo‘lining 12 kilometrlik qismi rekonstruksiya qilinadi. Loyiha iqlim o‘zgarishi va ekstremal ob-havo hodisalari ta’siriga bardosh berish uchun beton qoplamalar, ko‘tarilgan qirg‘oqlar va takomillashtirilgan drenaj tizimlarini o‘z ichiga olgan iqlimga chidamlilik xususiyatlarini qamrab oladi.
«Ushbu investitsiyalar O‘zbekistonning mintaqaviy tranzit markazi sifatidagi rolini mustahkamlab, Qoraqalpog‘istonda inklyuziv iqtisodiy o‘sishni qo‘llab-quvatlaydi», dedi OTB O‘zbekistondagi vakolatxonasi direktori Kanokpan Lao-Araya. «Iqlimga chidamli infratuzilma va intellektual transport tizimlarini joriy etish uzoq muddatli barqarorlikni ta’minlab, odamlar va biznes uchun sayohatni xavfsizroq va samaraliroq qiladi».
Loyihaning umumiy qiymati 293,7 million AQSh dollari bo‘lib, O‘zbekiston hukumati hissasi 60,6 million AQSh dollarni tashkil etadi. Ta’kidlanishicha, loyiha O‘zbekistonning 2030 yilgacha bo‘lgan strategiyasi va OTB 2030 yilgacha bo‘lgan strategiyasining operatsion ustuvorliklari, jumladan, iqlimga chidamlilik, gender tengligi va mintaqaviy integratsiya tamoyillariga mos keladi.
Qayd qilinishicha, bu yil OTB va O‘zbekiston hamkorligining 30 yilligi nishonlanmoqda. O‘zbekiston OTBga 1995 yilda a’zo bo‘lganidan beri Bank davlat sektoriga umumiy qiymati qariyb 14,3 milliard AQSh dollari miqdorida qarz, grantlar va texnik yordam ajratgan.
